ހަނިމާދޫ ކައުންސިލުގެ އިދާރާއިން ހަނިމާދޫ ސްކޫލުގެ ދުވަހީ މަސައްކަތްތަކާއި އެކި ކަންކަމުގައި ބޭނުންކުރުމަށްޓަކައި 1.5 ޓަނުގެ ރަށު ޕިކަޕެއް ހަދިޔާކޮށްފިއެވެ.
މިއަދު ހަނިމާދޫ ސްކޫލްގައި ބޭއްވުނު ހާއްސަ ރަސްމިއްޔާތެއްގައި، މިއުޅަނދު ސްކޫލާ ހަވާލުކޮށްދެއްވީ ހަނިމާދޫ ކައުންސިލުގެ މެންބަރުންނެވެ. ސްކޫލުގެ ފަރާތުން މި އުޅަނދާ ހަވާލުވެލެއްވީ ސްކޫލުގެ އިސްވެރިންނެވެ.
ހަނިމާދޫ ކައުންސިލުން މަޢުލޫމާތު ދެއްވި ގޮތުގައި، މި ޕިކަޕަކީ ސްކޫލުގެ ތަފާތު އިދާރީ މަސައްކަތްތަކަށާއި، އިތުރު ހަރަކާތްތަކަށް ބޭނުންވާ ތަކެތި އުފުލުމުގައި ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން ހަދިޔާކުރެވުނު އުޅަނދެކެވެ. މީގެ އިތުރުން، ސްކޫލުން ބާއްވާ ތަފާތު ހަރަކާތްތަކަށް ބޭނުންވާ ސާމާނު ރައްކާތެރިކަމާއެކު އުފުލުމަށް މި ޕިކަޕުގެ ސަބަބުން ބޮޑު ލުޔެއް ލިބިގެންދާނެއެވެ.
މި ރަސްމިއްޔާތުގައި ހަނިމާދޫ ސްކޫލުގެ ފަރާތުން ވަނީ ކައުންސިލުން ސްކޫލުގެ ތަރައްޤީއަށާއި ދަރިވަރުންގެ ތަޢުލީމީ ކަންކަމަށް ދެއްވާ އެއްބާރުލުމާއި، ވެދެއްވާ އެހީތެރިކަމަށްޓަކައި ކައުންސިލުގެ މެންބަރުންނަށާއި އިދާރީ މުވައްޒަފުންނަށް ޝުކުރު އަދާކުރައްވާފައެވެ.
ހަނިމާދޫ ކައުންސިލުން އަބަދުވެސް އަންނަނީ ރަށުގެ ތަޢުލީމީ ދާއިރާ ކުރިއެރުވުމަށާއި، ސްކޫލަށް ބޭނުންވާ އެކި ފުރސަތުތަކާއި ވަސީލަތްތައް ފޯރުކޮށްދިނުމުގައި ހަރަކާތްތެރިވަމުންނެވެ.