ހަނިމާދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީ ގެ މި އަހަރުގެ އެކްޓިވިޓީ ޕްލޭންގެ ދަށުން ރަށުގެ މުއައްސަސާތަކާއި ކުލަބް ޖަމިއްޔާތަކާ ބައްދަލުކުރުމަށް ހަމަޖެހިފައިވާ ޕްރޮގްރާމްގެ ތެރެއިން، "ހަނދުމަ" ޖަމިއްޔާއާއެކު ފުރަތަމަ ރަސްމީ ބައްދަލުވުން ބާއްވައިފިއެވެ.
ހަނިމާދޫ ކައުންސިލް އިދާރާގައި ބޭއްވުނު މި ބައްދަލުވުމަކީ، ކޮމެޓީގެ މިއަހަރުގެ ލަނޑުދަނޑިތައް ޙާޞިލުކުރުމަށާއި، ރަށުގެ ކުރިއެރުމަށް މަސައްކަތްކުރާ މަދަނީ ޖަމިއްޔާތަކާއެކު އޮންނަ ގުޅުން ބަދަހިކުރުމުގެ މަޤްޞަދުގައި ބޭއްވުނު ބައްދަލުވުމެކެވެ.
މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އެކްޓިވިޓީ ޕްލޭނުގައި ހިމެނޭ ކަންކަން ޢަމަލީގޮތުން ތަންފީޛުކުރުމުގައި ދެ ފަރާތް ގުޅިގެން ކުރެވިދާނެ މަސައްކަތްތަކާ ގުޅޭގޮތުންނެވެ. އެގޮތުން، ރަށުގެ ރައްޔިތުންގެ ދީނީ ހޭލުންތެރިކަން އިތުރުކުރުމަށްޓަކައި ކުރިއަށް ގެންދިއުމަށް ނިންމާފައިވާ "ދަރުސް ދިނުމުގެ ޕްރޮގްރާމް" ރޭވުމާ ގުޅޭގޮތުން ދެފަރާތުން ފުޅާ ދާއިރާއެއްގައި ޚިޔާލު ބަދަލުކުރިއެވެ.
މި ބައްދަލުވުމުގައި މަޝްވަރާކުރެވުނު މުހިންމު ކަންތައްތަކުގެ ތެރޭގައި:
ދަރުސް ޕްރޮގްރާމް އިންތިޒާމުކުރުން: ދަރުސްތައް ކުރިއަށް ގެންދާނެ މައުޟޫޢުތައް ކަނޑައެޅުމާއި، ރާއްޖޭގެ ފާހަގަކޮށްލެވޭ ދީނީ ޢިލްމުވެރިން ހަނިމާދޫއަށް ދައުވަތު އަރުވައިގެން ޕްރޮގްރާމް ވީހާވެސް ކާމިޔާބުކަމާއެކު ކުރިއަށް ގެންދިއުމަށް ބޭނުންވާ ލޮޖިސްޓިކްސް ކަންކަން ހަމަޖެއްސުން.
އެކްޓިވިޓީ ޕްލޭނަށް އެއްބާރުލުންދިނުން: ޑަބްލިޔު.ޑީ.ސީގެ މިއަހަރުގެ ޕްލޭނުގައި ހުރި އިޖުތިމާޢީ އަދި ހޭލުންތެރިކުރުމުގެ އެހެނިހެން ހަރަކާތްތަކުގައި "ހަނދުމަ" ޖަމިއްޔާގެ ފަރާތުން ވެދެވޭނެ އެހީތެރިކަމާއި އެއްބާރުލުން ދެނެގަތުން.
ހަނިމާދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީން މަޢުލޫމާތު ދެއްވިގޮތުގައި، ރަށުގެ ތަރައްޤީއަށް ކުރެވޭ މަސައްކަތްތައް ބާރުގަދަކުރެވޭނީ ރަށުގައި ހުރި މުއައްސަސާތަކާއި ޖަމިއްޔާތަކުގެ ބައިވެރިވުން އިތުރުކޮށްގެންނެވެ. އަދި "ހަނދުމަ" ޖަމިއްޔާއާއެކު ބޭއްވުނު މި ފުރަތަމަ ބައްދަލުވުމަކީ ކުރިއަށް އޮތް ތަނުގައި ގުޅިގެން ހިންގޭނެ ގިނަ ހަރަކާތްތަކަކަށް ވަރަށް އުންމީދީ މަގެއްގެ ގޮތުގައި ކޮމެޓީން ފާހަގަކުރެއެވެ.
މި ޕްރޮގްރާމްގެ ދަށުން ރަށުގެ އެހެން މުއައްސަސާތަކާއި ކުލަބް ޖަމިއްޔާތަކާ ބައްދަލުކުރުމުގެ ސިލްސިލާ ބައްދަލުވުންތައް ކުރިއަށް އޮތް ދުވަސްތަކުގައިވެސް ބޭއްވުމަށް ހަމަޖެހިފައިވާ ކަމަށް އެ ކޮމެޓީން ބުނެއެވެ.